د کابل ښاروالۍ د ځمکې د بیا تنظیم او ښاري بیا پراختیا ریاست په پام کې لري چې، د دیارلسمې ناحیې لسم ګذر په یوه پلاني سیمه بدل کړي او د یادې سیمې په 12.7 هکټاره ځمکه کې چې 204 ملکیتونه پکې شامل دي، د ځمکې د بیا تنظیم یوه پروژه پلې شي. د سیمې اوسېدونکو ته خبر ورکړل شوی چې، له معیار سره سم د نويو کورونو جوړولو په موخه به په یاده سیمه کې د استملاک پر ځای د ځمکې دبیا تنظیم او ښاري بیا پراختیا پروژه پلې شي او له یادې کړنلارې څخه به د کابل ښار په نورو سیمو کې هم ګټه واخیستل شي. ورته مهال د سیمې اوسېدونکو ژمنه وکړه چې، د پروژې په پلي کېدو کې به له کابل ښاروالۍ سره همکار و اوسي. په دې پروژه کې د ښاریانو حقونه خوندي دي او ګڼ شمېر ښاري زیربناو او آسانتیاو ته به لاس رسی ومومي. د ځمکې دبیا تنظیم او د ښاري بیا پراختیا عملیې دوه هغه لارې دي چې، کیدای شي د ځمکې د پراختیا او پلان جوړونې په برخه کې د استملاک پر ځای وکارول شي. د سیمې د سروې چارې د ځمکې دبیا تنظیم او ښاري بیا پراختیا ریاست له لوري له ناحیې سره په همغږۍ کې ترسره کیږي، چې د پرمختیايي پلانونو تر جوړولو او منظورۍ وروسته به د پروژې د پلي کېدو په اړه عملي اقدام وشي او یاده سیمه به په یوه پلاني سیمه بدله شي