له کمپنۍ سړک څخه تر برچي سړک پورې د نوي نښلوونکي سړک د جوړولو چارې، چې څه موده وړاندې د کابل ښاروالۍ د کار، ساتنې او څارنې ریاست له خوا پیل شوې وې، له دوه خواوو څخه په چټکۍ روانې دي. دغه سړک چې د کمپنۍ له قلعه ناظر سیمې څخه د نخاس تر حمام پورې، ( ۲۲۷۴ ) متره اوږدوالی او (۳۰ ) متره سور لري، د يوه معياري سړک د ټولو جزئياتو په ګډون به په روان کال کې په بنسټیزه توګه جوړ شي. د یادولو وړ ده چې، د یاد سړک د جوړولو چارې تر دې دمه (۳۰) سلنه مخته تللې دي. د دې سړک په جوړیدو سره به د پل سوخته په سیمه کې د ګڼې ګوڼې ستونزې راکمې او د ګاونډیو سیمو اوسیدونکو ته به اقتصادي وده او ګڼې ښاري آسانتیاوې رامنځته شي. د کابل ښاروالۍ مسوولان به په منظم ډول د کار د ښه کیفیت او په ټاکلي وخت د پروژې دپلي کیدو په موخه، خپلو فني او تخنیکي څارنو ته دوام ورکوي