د یوه پاک، سوکاله او ښکلي کابل ښار د درلودلو او د مسؤلينو او ښاریانو ترمنځ د همکارۍ د روحیې د پیاوړتیا په موخه، د کابل ښاروالۍ د نشراتو او عامه پوهاوي ریاست په غوښتنه د دریمې ناحیې په اړوندو سیمو کې تنظیفي او د اوبو لګولو حشر ترسره شو. په دې حشر کې د درېيمې ناحيې مسوولانو او اوسیدونکو د دې ناحیې له بېلابېلو سيمو څخه خواره واره کثافات راټول او د تنظیف رياست د کارکوونکو له خوا له ښار څخه بهر ټاکلې ځای ته ولېږدول شول او هم يې په بېلابېلو برخو کې زرغونې سیمې او ونې خړوب کړې. د کابل ښاروالۍ د نشراتو او عامه پوهاوي رئیس قاري واسع الله زاهد، په دې حشر کې د ښاریانو له ګډون څخه مننه وکړه، او ویې ویل چې، په ګډ کار سره به د ښار پاکوالي،ښکلا او زرغونتیا ته لا ښه زمینه برابره شي، او د دې حشر د ترسره کولو موخه، د کثافاتو ټولول، په ښاري سیمو کې د کثافاتو له اچولو څخه مخنیوی او په ګرم موسم کې د ونو د خړوبولو لپاره د زمینې برابرول دي. ورته مهال د درېيمې ناحيې مرستيال مفتي اختر محمد عثماني په دې اړه وويل: که ښاريان د خپل چاپېریال پاکوالي ته پاملرنه وکړي، نو له یوې خوا به د کثافاتو د تولید کچه راټیټه او په اسانۍ سره کیدای شي راټول او له بلې خوا به د تنظیف ریاست دکارکوونکو په اوږو دروند بار سپک شي. دغه راز د درېیمې ناحیې اوسېدونکو ژمنه وکړه، چې د ښار په پاک ساتلو او ددې ناحیې په بیلا بیلو سیموکې به دونو په خړوبولوکې له کابل ښاروالۍ سره مرسته کوي