د شپږمې ناحيې د ګذروکيلانو د شورا په مشورتي غونډه کې ښاغلي عبداللطيف د دې ناحیې د ګذر وکيلانو د شورا د رئيس په توګه وټاکل شو. په دې ناسته کې د شپږمې ناحيې رييس مولوي محمد ايوب ثابت د چاپېريالي او ښاري ستونزو د پېژندنې او حل په اړه معلومات ورکړل او ټينګار يې وکړ، چې د ښاري خدمتونو د بهير د ګړنديتوب لپاره بايد د ګذر وکيلان هر اړخيزه مرسته وکړي، اوس تر بل هر وخت د ګذر وکیلانو ته په کار ده چې، د کابل ښاروالۍ له مسوولینو سره د ټولنیز وضعیت د ښه والي او د سیمه ییزو او ښاري ستونزو د حل په برخه کې زیاته همکاري وکړي. نوموړي د شپږمې ناحیې د ګذر وکیلانو د پخواني رییس حاجي وزیر ګل د ګټورو خدمتونو او له پر له پسې همکاریو څخه قدرداني هم وکړه. همدا رنگه محمد ناصر کبیري د کابل ښاروالۍ د خلکو همغږۍ رئیس وویل چې د کابل ښاروالۍ ټول مسوولین ښاریانو ته دلا ښو چوپړتیاوو وړاندې کولو ته چمتو دي، او د ګذر وکیلانو له نظرونو او وړاندیزونو څخه په ګټې اخیستنې به راتلونکي پروګرامونه او پلانونه جوړ او د پلي کولو لپاره به یې وړاندې کړو، موږ به دمسؤولیت د احساس او د ښاري نظم د ښه والي لپاره د مرستې په پیاوړې روحیې سره، غښتلي ګامونه پورته کړو