دښاري سیمو دزرغونتیا په موخه، د کابل ښاروالۍ د ټولنیزو او کلتوري چارو دمرستیال مولوي حبیب الرحمن منصور په مشرۍ، او د څلورمې ناحیې د سیمه ییزو شوراګانو او اوسیدونکو په ګډون، په دې ناحیه کې د ونو او بوټو د خړوبولو حشر ترسره شو، چې په ترڅ کې یې بیلابیلې زرغونې سیمې او ګڼ شمیر ونې خړوب شوې. د کابل ښاروالۍ د ټولنيزو او کلتوري چارو مرستیال په خپلو خبروکې دزرغونو سیمو او د ونو خړوبولو ته د دغه حشر ګډونوال وهڅول او ويې ويل، چې د کابل ښاروالۍ د زرغونتیا رياست امکانات او سرچينې محدودې دي او نشي کولای چې د ښار ټولې ونې او زرغوني سیمې خړوب کړي، نو له همدې امله په دې برخه کې د عامو خلکو مرسته اړينه ده. همدارنګه ښاغلي منصور وویل: د ځمکې لاندې اوبو کچه راټیټه شوې، نو اړتیا ده چې په ویالو کې د اوبو د فلټرونو په نصبولو او د فاضله او کارول شویو اوبو له فلټرکولو وروسته، باید ترلاسه شوې اوبه د ونو او زرغونوسیمو د خړوبولو لپاره وکارول شي. په ورته وخت کې د څلورمې ناحیې اوسیدونکو ژمنه وکړه، چې د یوه پاک او زرغون کابل د درلودلو په موخه به له کابل ښاروالۍ سره تل همکار پاتې شي