د کابل ښاروالۍ، د کرنې، اوبولګولو او مالدارۍ وزارت، د کسبګرو د خونې او د قصابانو د اتحادیې تر منځ، د کاریزمیر او ریشخور په سیمو کې له شته مسلخونو څخه د ګټې اخیستنې په اړه، د همغږۍ ګډه غونډه ترسره شوه. په دې غونډه کې د کابل ښاروالۍ د چاپېريال ساتنې رئیس مولوي ياسرعمري وويل، چې د قصابانو او نورو عامه ځايونو په مخ کې د څارويو ذبح کول، په ځانګړي ډول د هوټلونو خاوندانو له خوا د هوټلونو په انګړکې ذبح کول په کلکه منع دي. کابل ښاروالۍ پلان لري چې، د ښار د معیاري ودې او له راز راز ناروغیو څخه د ښاریانو د روغتیا د خوندي کولو او همدارنګه د ښار په بیلابیلو زونونو کې د ښاري تاسیساتو له ویجاړولو څخه دساتنې په موخه، له اړوندوادارو سره په همغږۍ د څارویو د ذبحې لپاره ځانګړي ځایونه وټاکي، چې د سروې چارې او تخنیکي سندونه به یې ډېر ژر بشپړ، او د اوس وخت لپاره باید په کاریزمیر او ریشخور سیمو کې د کرنې، مالدارۍ او اوبو لګولو وزارت له شته مسلخونو څخه کار واخیستل شي. دغونډې ګډونوالوپه وار سره خپل نظرونه او وړاندیزونه وړاندې کړل او پرېکړه وشوه، چې قصابان په ځانګړې توګه د ودونو د هوټلونو مالکان دې په يادو مسلخونو کې خپل څاروي ذبح کړي، که نه نو له قانوني چلند سره به مخ شي. د کابل ښاروالۍ د چاپېریال ساتنې ریاست به په منع شویو ځایونو کې د څارویو د ذبحې د مخنیوي لپاره په دوامداره توګه څارنه کوي