د لومړۍ ناحيې د ګذر وکيلانو دشورا په مشورتي غونډه کې، ښاغلى بريالی امين د دې ناحیې د ګذر وکيلانو د شورا د رئيس په توګه وټاکل شو. په دې مشورتي غونډه کې د لومړۍ ناحيې رئیس مولوي محمد عالم عاصم په خپلو خبروکې د ګذر وکيلانو مکلفيتونه او مسووليتونه په ګوته کړل او ويې ويل، چې د سیمه ییزو او ښاري ستونزو په پېژندلو او له منځه وړلو کې د ګذر وکيلانو رول مهم دى، او باید د ښاري چوپړتیاوو دګړندي کولو په برخه کې هر اړخیزې مرستې وکړي. نوموړي د دې ناحیې د ګذر وکيلانو د شورا د پخواني رئیس سيد حسن پرويزي د ګټورو خدمتونو او پرله پسې همکاريو څخه مننه وکړه او زياته يې کړه، چې د کابل ښاروالۍ مسوولين د ښاریانو خدمت ته چمتو دي، او په دې برخه کې به د ګذر وکيلانو له نظرونو او وړانديزونو څخه په ګټې اخیستنې خپل راتلونکي پروګرامونه او پلانونه جوړ او پلي کړي. ښاغلي عاصم زیاته کړه چې، موږ به د مسؤلیت د احساس او د مرستې په پیاوړې روحیې سره، د ښار د آبادۍ او ښه ښاري نظم لپاره کوټلي ګامونه پورته کړو