د ښاري زیربناوو د ساتنې په اړه د کابل ښاروالۍ، د مخابراتو او معلوماتي ټکنالوژۍ وزارت، برشنا شرکت او د اوبو رسولو او ښاري فاضلاب شرکت ترمنځ د همغږۍ ګډه غونډه ترسره شوه. په دې غونډه کې د کابل ښاروالۍ د پلان، پالیسۍ، څارنې او ارزونې رئیس محمد قاسم افغان د سړکونو او پلولارو د ساتنې په برخه کې د یادو ادارو ترمنځ د همکارۍ د تفاهم لیک د مادو په اړه، چې ټاکل شوې ده لاسلیک شي، معلومات ورکړل او ویې ویل چې، له بده مرغه په تېرو وختونو کې د ښار یو شمېر سړکونه او پلې لارې د اوبو رسولو، برېښنا او انټرنیټي شبکو د رامنځته کولو په برخه کې د همغږۍ او همکارۍ د نه شتون له امله؛ په غیر معیاري توګه کیندل شوي چې اوس هم ویجاړ پاتې دي. ښاغلي افغان زیاته کړه چې، کابل ښاروالۍ غواړي د ښاري زیربناوو د ساتنې او څارنې په برخه کې د همکارۍ دغه هوکړه لیک ژر تر ژره د ښاري سکتور له نورو ادارو سره لاسلیک کړي. نوموړي دا هم په ډاګه کړه چې، د دغه تفاهم لیک یوه ماده د شبکو د جوړولو په موخه د ښاري زیربناوو له جوړېدو مخکې د بشپړې همغږۍ رامنځته کولو په اړه ده. له بلې خوا د یادو ادارو استازو ژمنه وکړه چې، د ښاري زیربناوو د ساتنې او څارنې په برخه کې به له کابل ښاروالۍ سره مرسته وکړي