د ښاریانو او مسوولانو تر منځ د مرستې د روحیې د پیاوړتیا او دښکلي او زرغون ښار درلودلو په موخه، د اتمې ناحیې په کچه تنظیفي او د ونو او زرغونو سیمو د خړوبولو حشر ترسره شو. په یاد حشر کې ګډون کوونکو خواره شوي کثافات راټول کړل چې د تنظیف ریاست د کارکوونکو له لوري له ښار څخه د باندې ولیږدول شول او دغه راز د ناحیې په بیلابیلو برخوکې ونې او زرغونې سیمې هم خړوب شوې. د اتمې ناحیې رئیس سیدشاه حمیدي د حشر له ګډونوالو مننه وکړه او ویې ویل چې، په ګډکار سره کولای شو خپل ښار پاک، زرغون او سمسور وساتو. له دې حشر څخه موخه، د کثافاتو راټولول او د دوبي په دې موسم کې د زرغونو سیمو او ونو خړوبول دي. د ښاغلي حمیدي په وینا که چېرته ښاریان په خپل چاپېریال کې پاکوالي او نظافت ته پام وکړي اوکثافات په ټاکلو ځایونو کې وغورځوي، نو د نارنجي اغوستونکو د اوږو بار به سپک کړي. ورته مهال د یادې ناحیې اوسېدونکو ژمنه وکړه چې، د آباد، سمسور او ښایسته کابل ښار د جوړېدو په برخه کې به له کابل ښاروالۍ سره همکار و اوسي، په خپلو سیمو کې به د کثافاتو له تیتولو ډډه وکړي او په منظمه توګه به د یادې ناحیې زرغونې سیمې او ونې خړوب کړي