د ښاري کلتور د ودې او د عامه تاسیساتو د ساتنې په اړوند، دکابل ښاروالۍ د خپرونو او عامه پوهاوي ریاست له لوري د یوولسمې، دوولسمې، دیارلسمې، څوارلسمې پنځلسمې او شپاړلسمې ناحیو له ګذر وکیلانو، دیني عالمانو او ځوانانو سره د عامه پوهاوي غونډه ترسره شوه. د کابل ښاروالۍ د ښاري خدمتونو او چاپیریال ساتنې مرستیال مولوي محمد خالد سجستاني د ښاري کلتور د ودې او د ښاري ژوند د قانوني کېدو په برخه کې د ښاریانو رول مهم وباله او ویې ویل چې، اړتیا ده ټول په ګډه د ښارپاک ساتلو، ښاري نظم او د ښاري کلتور د ودې په برخو کې خپل مسئولیتونه ادا کړو. د کابل ښاروالۍ د خپرونو او عامه پوهاوي رئیس قاري واسع الله زاهد په خپلو خبرو کې د غونډې موخې بیان کړې او له ګذر وکیلانو یې وغوښتل، چې د کابل ښاروالۍ پیغام په ښه توګه تر خپلو مئوکلینو او ښاریانو ورسوي. په غونډه کې د اوبو او انرژۍ وزارت د اوبو د تنظیم رئیس نثار، د کابل ښاروالۍ د ارشاد او دعوت رئیس، د دوه ویشت ګونو ناحیو د ګذر وکیلانو شورا رئیس، دیني عالمانو او ځوانانو هم په خپل وار خبرې وکړې او په ټولو برخو په ځانګړې توګه د خوږو اوبو د سپما کولو په برخه کې یې سپارښتنې وکړې. د عامه پوهاوي په دې غونډه کې یو شمېر روزنیز ویډيويي کلپونه هم نندارې ته وړاندې شول چې، د ګډونوالو د خوښې وړ وګرځیدل