کابل ښاروال مولوي عبدالرشید په کابل کې د ترکیې سفارت د سوداګرۍ برخې له سلاکار ایمري انال سره په کابل ښار کې د پانګونې د پروژو په اړه ولیدل. په دې لیدنه کې کابل ښاروال وويل، د کابل او ترکيې د ښارونو ترمنځ بايد معنوي اړيکې پياوړې شي، او د ښارونو ترمنځ د اړيکو د پراختيا او له شته فرصتونو څخه په سمه توګه د استفادې لپاره بايد په علمي او تخنيکي برخه کې دوه اړخيزې مرستې ترسره شي. کابل ښاروالۍ په پام کې لري چې، په کابل کې د کورنیو او بهرنیو خصوصي سکټور په ځانګړې توګه ترکي پانګوالو ته د خوندي پانګونې زمینه برابره کړي. همدا راز د ترکیې سفارت د سوداګرۍ برخې سلاکار خپله علاقمندي وښوده او ژمنه یې وکړه، چې د کابل ښار د معیاري ودې او پراختیا په ځانګړي ډول د سوداګریزو بلاکونو د جوړولو په برخه کې به له کابل ښاروالۍ سره مرسته وکړي. نوموړي له کابل ښاروال څخه غوښتنه وکړه، چې د حضوري چمن ته څېرمه د بلاک جوړولو د پروژې قانوني ستونزې او برخلیک، چې په تېرو کلونو کې د کابل ښاروالۍ له خوا د ترکیې هېواد له یوه خصوصي سکتور سره هوکړه شوې وه او د ځینو لاملونو له امله یې دجوړولو چارې ودریدلې دي معلوم کړي ترڅو یې د جوړولو چارې بیا ځلي پیل شي. په پای کې کابل ښاروال ژمنه وکړه چې، حضوري چمن ته څېرمه د بلاک جوړولو پروژې موضوع به د کابل ښاروالۍ له لوري وڅېړل شي، او کابل ښاروالۍ د پانګونې د ودې او له خصوصي سکتور څخه د ملاتړ په موخه به لازمې اسانتیاوې برابرې کړي