د ښاري کلتور د ودې او ترویج په موخه، د کابل ښاروالۍ د خپرونو او عامه پوهاوي ریاست له خوا، د یوولسمې ناحیې اړوند د غلام حیدر خان عالي لېسې له زده کوونکو سره د ښاري مسایلو په اړه د عامه پوهاوي غونډه ترسره شوه. د کابل ښاروالۍ د خپرونو او عامه پوهاوي رئیس قاري واسع الله زاهد د دغه پروګرام له ترسره کېدو څخه موخه، د ښاریانو په ذهن کې د هېواد پالنې او د ټولنیز او فردي مسؤلیت د احساس را ژوندي کول وبلل او ویې ویل، چې د ښاریانو په ځانګړې توګه د ځوان نسل په مرسته کولای شو کابل ښار په یوه پاک، زرغون، آباد او ښکلی ښار بدل کړو. ښاغلي زاهد د کابل ښاروالۍ د راتلونکو پلانونو او پروګرامونو په پلي کولو کې د کابل ښاریانو مرسته اړینه وبلله. دغه راز په دې پروګرام کې د یوولسمې ښوونیزې حوزې آمر، د یادې لېسې مدیر، استادانو او زده کوونکو د ښاري کلتور د ودې په برخه کې له کابل ښاروالۍ سره د مرستو ژمنه وکړه او ویې ویل، چې د اصولو او مقرراتو په پام کې نیولو سره کولای شو، ډېر ژر په خپل ژوندکې هوساینه او آرامي احساس کړو. همدارنګه دوی د کابل ښاروالۍ د عامه پوهاوي له پروګرامونو هرکلی وکړ. د عامه شتمنیو او د ښاري او زرغونو سیمو په ساتنه کې د ښوونځیو د زده کوونکو رول مهم دی. په دې پروګرام کې زده کوونکو ته د ښوونیزو ویډیوګانو د وړاندې کولو له لارې، د پوښتنو او ځوابونو زمینه برابره شوه او د هغوی دتشویق او هڅونې په موخه، د کابل ښاروالۍ د عامه پوهاوي ریاست له خوا یو شمېر تبلیغاتي پاڼې او ډالۍ هم ووېشل شوې