د کابل ښاروالۍ د ټولنیزو او کلتوري چارو دمرستیال مولوي حبیب الرحمن منصور په مشرۍ، د دیارلسمې ناحیې اړوند سیموکې د یادې ناحیې د مسوولانو او سلګونو اوسیدونکو په ګډون، تنظیفي او د ونو خړوبولو حشر ترسره شو. د کابل ښاروالۍ د ټولنيزو او کلتوري چارو مرستیال په دې حشرکې دګډون کوونکو د هڅونې او له هغوی څخه د مننې په ترڅ کې وويل، چې د ښار پاکوالي او زرغونتيا ته پاملرنه د ټولو ګډ مسووليت دى. مولوي منصور د دې ناحیې له ټولو اوسیدونکو وغوښتل چې، د یوه پاک او زرغون کابل ښار د درلودلو په نیت، د کابل ښاروالۍ له کارکوونکو سره مرسته وکړي. نوموړي زیاته کړه چې،پاکوالی او زرغونتیا، هوسا او ښکلی ژوند رامنځته کوي او د ښېه راتلونکې بنسټ جوړوي. همدا راز د دیارلسمې ناحیې رئیس محمد حامد امیري وویل، د دیارلسمې ناحیې اوسیدونکو په ګډو ښاري او ټولنیزو چاروکې خپل مسوولیت اداء کړی او په راتلونکي کې هم له کابل ښاروالۍ سره د دا ډول ګډو کارونو په ترسره کولو کې دمرستو ژمنه کوي. هغه زياته کړه، چې د کابل ښاروالۍ د کارکوونکو او ماشينرۍ تر څنګ، سيمه ييزو شوراګانو، يو شمېر خصوصي تنظیفي او د اوبو رسولو شرکتونو، د اوبو د ټانکرونو او د زرنج وسایطو او نورو تجهيزاتو په برابرولوکې مرسته کړې، چې د ستاينې وړ دي. د دې حشر ګڼ شمیرګډونوالو د کابل ښاروالۍ له کارونو او پلانونو څخه خپل ملاتړ اعلان کړ او ویې ویل، چې د همکارۍ په ټینګې روحیې سره به د دیارلسمې ناحیې د بېلابېلو سیمو د پاکوالي، زرغونتیا او آبادۍ زمینه برابره شي