د کابل ښاروالۍ او د چارو ادارې د اداري اصلاحاتو او ملکي خدمتونو څانګې ترمنځ د شوي هوکړه لیک له مخې په کابل ښاروالۍ کې د پیچلو اداري پړاونو د ساده کولو کار پیل شو. کابل ښاروال مولوي عبدالرشید د پیچلو اداري پړاونو د ساده کولو په موخه له اړوند کمېټې سره غونډه ترسره کړه او د يادې کمېټې کړنې یې مثبتې و ارزولې. نوموړي وویل چې، یادې کمېټې تر دې دمه ۷۶ پروسې پیژندلې دي او دوی ښاریانو ته د غوره خدمتونو وړاندې کولو په موخه د اداري پړاونو ساده او آسانه کولو ته ژمنتیا لري. کابل ښاروال دغه راز ټینګار وکړ چې،اړینه ده د پړاونو د ساده کولو په برخه کې یاده اداره خپلې مرستې له موږ ونه سپموي. په یاده غونډه کې د اداري پړاونو د پېژندلو آمر خواجه زړګي امیري د مرستې ژمنه وکړه او ویې ویل چې، په کابل ښاروالۍ کې د اداري پړاونو له ساده کولو څخه موخه د وخت له بې ځایه لګښت څخه مخنیوی او ښاریانو ته د غوره خدمتونو وړاندې کول دي. د اداري پړاونو د ساده کولو ریاست د چارو ادارې یوه برخه ده چې، په تېر یوه کال کې یې په بېلابېلو ادارو کې اداري پړاونه اصلاح او آسانه کړي دي. د یادونې وړ ده چې، په کابل ښاروالۍ کې هم له پېژندلو وروسته اداري پړاونه آسانه او ساده کیږي او په دې برخه کې به عملي ګامونه پورته شي