د خیرخانې کوتل سړک د دویمې برخې د جوړولو چارې د کابل ښاروالۍ له لوري په دوه کاري شفټونو (شپه او ورځ) کې د ټاکلي وخت او ډیزاین شوې طرحې سره سم روانې دي. دکابل ښاروالۍ د برنامو او پروژو د تنظیم ریاست د معلوماتو له مخې؛د دې مهم او حیاتي سړک د جوړولو لومړني اساسي کارونه روان دی، ترڅو د قیر ریزۍ لپاره زمینه مساعده شي. د خنډونو لرې کول او په ټاکل شویو ځایونو کې د بریښنا د پایوو لګول د دې سړک د پروژې بله مهمه برخه ده. د دغه سړک د جوړولو قراردادي شخص ته سپارښتنه شوې، چې د موټرو د تېرېدو پر مهال د چاپيريال د ککړتیا د مخنیوي او خوندیتوب په موخه اوبه وشيندي. دخیرخانې کوتل سړک د هېواد په شمال کې د څوارلس ولایتونو ترانزیتي لار او د نښلولو نقطه ده، چې جوړول او ورته پراختیا ورکول یې د کابل ښاروالۍ له لومړیتوبونو څخه شمېرل کیږي. په لومړي قدم کې به د سړک کیڼ اړخ ته د سرای شمالی چوک څخه تر د کوتل بازار پورې د ۳۷۱۰ مترو په اوږدوالي او د ۲۷ مترو په عرض سره د ۳۷۰ میلیونه افغانیو په ارزښت پراختیا ورکړل شي. کابل ښاروالۍ په پام کې لري چې په راتلونکي کې د کابل شمال ته د دغه مهم سړک د دویم اړخ د جوړښت او پراخوالي چارې هم پیل کړي