د کابل ښاروالۍ د ټولنيزو او کلتوري چارو معین مولوي حبيب الرحمن منصور د ښار د دوه ویشتو ګونو ناحیو د ګذر وکیلانو شورا رئیسان له له کابل ښاروالۍ سره د دوی د ګډو مکلفيتونو د ترسره کولو له امله خوښي وښوده او ورڅخه یې ستاینه وکړه. د کابل ښاروالۍ د ټولنيزو او کلتوري چارو معین وويل: په دې وروستيو کې د ګذر وکيلانو د ښاري برنامو او پلانونو په عملي کولو کې مثبت رول لوبولى دى. هغه هيله څرګنده کړه چې د هرې ناحیې د ګذر وکيلانو شورا به له کابل ښاروالۍ سره نوره همغږي هم رامنځته کړي.د ښاري ستونزو د حل لپاره د مناسبو لارو د ګوته کولو په برخه کې به خپلو همکاریو ته لا هم دوام ورکړي. په ورته وخت کې د هرې ناحیې د ګذر وکیلانو د اصلي او فرعي سړکونو د خرابوالي، د تنظیف او زرغونتیا،د لښتیو د جوړولو، د تفریحي پارکونو د جوړولو او نورو مسایلو په اړه د خپلې ناحيې ستونزې او ننګونې مطرح کړې. مولوي منصور د نظرونو او وړانديزونو له اورېدو وروسته وويل: موږ د خلکو په رغنده نظرونو او د ستونزو په پېژندلو پوره باور لرو او هڅه کوو چې د همدې پر بنسټ خپل پلانونه جوړ او عملي کړو