د کابل ښاروالۍ د خپرونو او عامه پوهاوي ریاست له لوري د ښاري کلتور د ودې او د عامه تاسیساتو د ساتنې په موخه، د کابل ښاروالۍ د ټولنیزو او کلتوري چارو د مرستیال مولوي حبیب الرحمن منصور په مشرۍ د اوولسمې، اتلسمې، نولسمې، شلمې، یو ویشتمې او دوه ویشتمې ناحیو له ګذر وکیلانو، دیني عالمانو او ځوانانو سره د عامه پوهاوي غونډه ترسره شوه. د کابل ښاروالۍ د ټولنیزو او کلتوري چارو مرستیال په خپلو خبرو کې له ګذر وکیلانو څخه مننه وکړه چې، تل یې په ټولو ښاري چارو په ځانګړې توګه د غصب شویو سیمو دبېرته راګرځولو، تنظیف او زرغونتیا کې له کابل ښاروالۍ سره مرسته کړې ده او له دوی څخه یې وغوښتل چې، د تل په څېر له یادې ادارې سره خپلو مرستو ته دوام ورکړي. ور پسې د خپرونو او عامه پوهاوي رئیس قاري واسع الله زاهد په خپلو خبرو کې وویل: که چېرته د ښار پر وړاندې ټول ښاریان مسئولانه چلند وکړي، ډېر ژر به په کابل ښار کې د مثبت بدلون او پرمختګ شاهدان و اوسو. په غونډه کې د کابل سیندیزې حوزې عمومي رئیس انجنیر حبیب الرحمن حقپال، د دوه ویشت ګونو ناحیو د ګذر وکیلانو شورا رئیس او یوشمیر دیني عالمانو په خپل وار خبرې وکړې او له کابل ښاروالۍ سره یې د هر راز مرستو ژمنه وکړه. د غونډې په لړ کې د ښاري کلتور د ودې په اړوند یو شمېر ویډیويي کلپونه هم نندارې ته وړاندې شول چې، د ګډونوالو د خوښې وړ وګرځېدل