د لسمې ناحيې مسوولينو د دې ناحیې په سراى چقرک سيمه کې نږدې (۵) جريبه غصب شوې ځمکه بېرته راوګرځوله. د لسمې ناحیې مرستیال قاري عبدالحي شهیدزي وویل چې، یو شمېر فرصت غوښتونکو په تېرو کلونو کې په یاده ځمکه باندې ناقانونه تاسیسات جوړکړي وو، چې تر پېژندلو وروسته دا سیمه له خپلسرو تاسیساتو پاکه او اوس دکابل ښاروالۍ په واک کې ده. نوموړي زیاته کړه، دا ځمکه چې د کابل ښاروالۍ ملکیت دی، په غیر پلاني سیمه کې موقعیت لري او په راتلونکې کې به د پراختیایي پلان د پلي کولو په موخه چمتو شي. کابل ښاروالۍ د غصب شویو ځمکو بېرته را ګرځولوته لیوالتیا لري او هیڅ چاته به اجازه ورنه کړي چې، په بېلابېلو پلمو له دولتي ځمکو او عامه ملکیتونو څخه ناوړه ګټه پورته کړي.