د اتمې ناحیې په اتم ګذر کې د سرور کائینات او امام ابو حنیفه سیمې د کوڅو کانکریټ کولو چارې بشپړې او د کابل ښاروالۍ د پروګرامونو او پروژو د تنظیم رئیس انجنیر میرالرحمن ناصري او د یادې ناحیې د رئیس مولوي سیدشاه حمیدي له لوري په داسې حال کې چې، د سیمې مشرانو او ګڼ شمیر اوسېدونکو یې ملتیا کوله ګټې اخیستنې ته وسپارل شوې. په یادو مراسمو کې د پروګرامونو او پروژو د تنظیم رئیس وویل: د پروژې له کیفیت څخه د یاد ریاست انجنیرانو د تخنیکي اسنادو له مخې پر وخت څارنه کړې ده. د نوموړي په وینا؛ دا کوڅې په ټولیزه توګه (۶۵۲) متره اوږدوالی او په منځنۍ کچه (۵) متره سور لري، چې د لښتیو په ګډون د ملګرو ملتونو د پروژوي خدمتونو ادارې په ملاتړ د (۷.۷) میلیونه افغانیو په لګښت په (۶) میاشتو کې په بنسټیزه توګه جوړې شوې دي. د اتمې ناحیې رئیس بیا په خپلو خبرو کې وویل چې، د دې پروژې په بشپړېدو سره به د سیمې د اوسېدونکو پر وړاندې شته موسمي ستونزې حل شي او خلک به ترانسپورټي آسانتیاو ته لاس رسی ومومي. د نوموړي په وینا له دې کوڅو څخه به د سیمې اوسیدونکې په ښه توګه ساتنه کوي، او په راتلونکې کې به خلکو ته د آسانتیاو رامنځته کولو په موخه، ورته نورې پروژې هم پلې شي