په اتلسمه ناحیه کې تنظیفي او د ونو او زرغونو سیمو د خړوبولو حشر، د کابل ښاروالۍ د مسؤلانو او د دې ناحیې د اوسیدونکو په ګډون ترسره شو. د کابل ښاروالۍ دکلتوري چارو رئيس قاري ولي ګل جواد په خپلو خبرو کې د یادې ناحیې اوسیدونکي د زرغونو سیمو پاکوالي او پراختيا ته وهڅول او ويې ويل چې، د ښاري سیمو پاکوالى زموږ د ژوند بنسټ جوړوي او د اسلام د سپېڅلي دين له لارښوونو څخه شمیرل کیږي، له همدې امله دکابل ښار دبېلا بېلو ناحیو له اوسېدونکو څخه غوښتنه کوو ، چې د يوه پاک او ښکلي کابل ښار په رامنځته کولو کې د کابل ښاروالۍ له مسؤلانو سره مرسته وکړي. ورته مهال د اتلسمې ناحیې رئیس مولوي شمس الحق افغاني وویل چې، د دې ناحیې اړوند سیمو د پاکوالي او د زرغونو سیمو د پراختیا په موخه، د داتلسمې ناحیې د اوسیدونکو په مشوره او مرسته پلانونه او پروګرامونه تر لاس لاندې دي. د نوموړي په وینا؛ د یادې ناحیې اوسېدونکي ژمن دي چې، په راتلونکي کې هم له کابل ښاروالۍ سره د دا ډول پروګرامونو په پلي کولو کې مرسته وکړي. د اتلسمې ناحيې د علماوو شورا رئيس مولوي سيد احمد وثيق د ګډو کارونو د ترسره کولو په ارزښت خبرې وکړې او ویې ویل چې، د جمعې د لمانځه د خطبو له لارې د دې ناحیې اوسیدونکي ته سپارښتنه شوې ده څو، د ښار پر وړاندې خپل فردي او ټولنيزو مسؤلیتونه ترسره کړي، چې له نیکمرغه مثبتې پایلې یې ورکړې دي. د حشر ګډونوالو وویل چې، د ښار پاکول یوازې د کابل ښاروالۍ دنده نه ده، بلکې موږ ټولو ته په کار ده چې خپل ښار پاک او زرغون کړو. د دې حشر په پایله کې د اتلسمې ناحیې په بېلابېلو سیمو کې ونې خړوب شوې او له بېلابېلو سیمو څخه کثافات راټول او له ښار څخه دباندې ولېږدول شول