د ځمکې د سر اوبو د مدیریت په موخه د ښار په کچه د هغه ویالو او کانالونو د پاکولو چارې چې، د یو شمېر ښاریانو د ناغیړۍ له امله بند شوي روانې دي. په وروستیو کې د لومړۍ او دویمې ناحیې له لښتیو خاورې او خټې را و اېستل شوې او اوس مهال د څلورمې ناحیې اړوند د څارندوی بلاکونو او د لسمې ناحیې اړوند حاجي یعقوب څلورلارې سړک په اوږدو کې د لښتیو پاکولو چارې روانې دي. د کابل ښاروالۍ د تنظیف ریاست د کانالونو آمر نوید احمد شیرزاد وویل چې، د یاد ریاست شاوخوا ۲۰۰ تنه کارکوونکي له ماشینرۍ او وسایلو څخه په ګټه اخیستلو د ښار په کچه د لښتیو او کانالونو په پاکولو بوخت دي چې، هره ورځ له ۸۰ تر ۱۰۰ ټنه پورې کثافات او خاورې له لښتیو را باسي او له ښار څخه د باندې لیږدول کیږي. نوموړي زیاته کړه چې، کابل ښاروالي به په نږدې ورځو کې د شاوخوا ۴ زره کیلو مترو په اوږدوالي بند کانالونه او لښتي پاک کړي، څو د اورښتوتو پر مهال سړکونو ته د اوبو له راختلو مخنیوی وشي. له کابل ښاریانو غوښتنه کیږي چې، لښتیو او کانالونو ته د کثافاتو له اچولو څخه ډډه وکړي