ښاریانو ته د ترانسپورټي او ښاري آسانتیاو رامنځته کولو په موخه، د اوولسمې ناحیې اړوند لومړي او دویم ګذر د حضرت محمد (ص)، ابوبکرصدیق(رض) او خالد بن ولید (رض) جوماتونو په سیمو کې د کوڅو کانکریټ کولو چارې بشپړې او د یادې ناحیې د رئیس مولوي حبیب الحق حقاني ، د پروګرامونو او پروژو د تنظیم ریاست د استازي انجنیر ذبیح الله رحیمي له لوري په داسې حال کې چې، د سیمې مشرانو یې ملتیا کوله، ګټې اخیستنې ته وسپارل شوې. په یادو مراسمو کې د اوولسمې ناحیې رئیس وویل چې، د دې کوڅو په جوړېدو سره به د ښاریانو سیمه ییزې ستونزې حل او ګڼ شمېر آسانتیاو ته به لاس رسی ومومي. د نوموړي په وینا په راتلونکې کې به ورته نورې پروژې هم د یادې ناحیې په بېلابېلو سیمو کې پلې شي. ښاغلي حقاني د سیمې له اوسېدونکو وغوښتل چې، د عامه تاسیساتو په ساتنه کې له کابل ښاروالۍ سره همکار و اوسي. د کابل ښاروالۍ د پروګرامونو او پروژو د تنظیم ریاست استازي وویل چې، د لومړي ګذر کوڅې په ټولیزه توګه (۷۴۴) متره اوږدوالی او له (۴ تر ۵) مترو سور لري چې، د لښتیو په ګډون یې چارې د (۸.۱) میلیون افغانیو په لګښت په څلورو میاشتو او په دویم ګذر کې کوڅې چې، ( ۸۵۴) متره اوږدوالی او له (۴ تر ۵ ) مترو سور لري، چارې یې د (۱۰ ) میلیونه افغانیو په لګښت د پنځو میاشتو په موده کې د ملګرو ملتونو د پروژوي خدمتونو ادارې په ملاتړ په بنستیزه توګه بشپړې شوې