د کابل ښاروالۍ د پلان جوړونې او ښاري پراختیا د مرستیال ډاکتر صدرالدین تاجک په مشرۍ د ښاري فزیکي فضا د کیفیت معلومولو په ځانګړې توګه د ښار په کچه له تخنیکي او فني معیارونو سره برابر د ودانیو جوړولو د څارنې کړنلارې د څرنګوالي په اړه غونډه ترسره شوه. په یاده غونډه کې چې د کابل ښاروالۍ فني او تخنیکي څانګو مسئولانو ګډون کړی وو؛ د ښاري پراختیا او پلان جوړونې مرستیال وویل: د اوږدمهاله پلان له مخې د ښاري فضا د کیفیت معلومول د کابل ښاروالۍ له لومړیتوبونو څخه شمیرل کیږي چې، اوس مهال د ودانیو د کنټرول او څارنې کړنلارې په اصلاح کولو کار روان دی. ډاکتر صدرالدین تاجک د ښاري فضا د کیفیت معلومولو په اړه خپل علمي نظرونه او وړاندیزونه د غونډې له ګډونوالو سره شریک کړل او ټینګار یې وکړ چې، د کابل ښاروالۍ مسئولان دې د ودانیو د خوندیتوب مسایلو په ځانګړې توګه د طبیعي او مصنوعي پېښو لکه د زلزلې پر وړاندې د ودانیو د مقاومت موضوع تر جدي پلټنې لاندې ونیسي. په همدې توګه د پوهنتون استاد او د انجنیرۍ برخې متخصص انجنیر امین الله محمود له ستندردونو او معیارونو سره برابر د ودانیو جوړولو په اړه خپل علمي معلومات غونډې ته وړاندې کړل. نوموړي په امریکا او ترکیې هېوادونو کې د ودانیو د جوړولو کنټرول ته نه پاملرنه د یادونې وړ وبلله او زیاته یې کړه چې، په یادو هېوادونو کې دې برخې ته نه پاملرنه د دې لامل وګرځېده څو د زلزلې له امله لویې پېښې رامنځته شي. د ښاغلي محمود په وینا د کابل ښار په کچه باید ودانۍ له نړیوالو معیارونو سره برابرې جوړې شي، څو د احتمالي طبیعي پېښو پر وړاندې د ودانیو خوندیتوب وساتل شي