د دوه ویشتمې ناحیې په کچه د یادې ناحیې د مسئولانو او اوسیدونکو په ګډون تنظیفي او د زرغونو سیمو خړوبولو حشر ترسره شو چې، په پایله کې یې کثافات راټول او زرغونې سیمې او ونې خړوبې شوې. د دوه ویشتمې ناحیې رئیس مولوي قمرالدین ( طالب جان غازي) وویل چې، د ښار پاکوالی او زرغونتیا د هر ښاري مسئولیت دی ځکه کابل ښاروالۍ نشي کولای په یوازې توګه د ښار ټولې زرغونې سیمې خړوبې او ښارپاک کړي. نوموړي د یادې ناحیې له ټولو اوسېدونکو وغوښتل چې، د پاک او زرغون کابل رامنځته کولو په برخه کې له کابل ښاروالۍ سره همکار و اوسي. د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین د حشر له ګډونوالو مننه وکړه او ویې ویل چې، د مرستې دپیاوړې روحیې او ګډ کار سره به ډیر ژر د سوکاله ښاري ژوند شاهدان و اوسو. د حشر ګډونوالو د کابل ښاروالۍ له پروګرامونو او پلانونو خپل ملاتړ اعلان کړ او ویې ویل چې، د ونو خړوبول او د ښار پاک ساتل زموږ ټولو ګډه ملي او دیني دنده ده.