د کابل ښاروالۍ له لوري د اوومې ناحیې اړوند د پډولې او چهلستون سړکونو ترمنځ د نوي سړک د جوړولو چارې په چټکۍ سره روانې دي. د اوومې ناحیې رئیس مولوي عبدالغفور غفوري وویل، دا سړک له ځانګړي ارزښت څخه برخمن دی چې، په جوړېدو سره به یې د اړونده سیمو په ځانګړې توګه د پډولې پروژې اوسېدونکو ته ګڼ شمېر آسانتیاوې رامنځته او ورسره جوخت به د چهلستون بازار په ګڼه ګوڼه کې کمښت راشي. د کابل ښاروالۍ د پروژو او پروګرامونو د تنظیم ریاست د پروژو د څارنې آمر محمد فهیم دراني وویل، یاد سړک ۳۴۵ متره اوږدوالی او ۳۰ متره سور لري چې، د لښتیو، پلو لارو، د بایسکیل چلولو کرښو، ګلدانونو او نورو برخو په ګډون به د نږدې ۳۲ میلیونه افغانیو په لګښت په بنسټیزه او معیاري توګه جوړ شي