د دولسمې ناحیې یو شمېر اوسیدونکو د (چاپیریال ساتنې رضاکاران) تر نامه لاندې د یادې ناحیې اړوند له بت خاک څخه د احمدشاه بابا مېنې تر دویمې څلورلارې پورې د سړک په اوږدو کې ونو ته د چونې په ورکولو سره د ښار په زرغونتیا کې برخه واخیسته. د دولسمې ناحیې د زرغونتیا مدیر مولوي عزت الله وویل: ټاکل شوې ده چې، د چاپیریال ساتنې د رضاکارانو دغه ډله، له نباتي ناروغیو څخه د مخنیوي، دحشراتو دله منځه وړلو او دښاري ښکلا د رامنځته کولو په موخه، (۳) زره نیاګیو ته چونه ورکړي. یادو رضاکارانو ژمنه وکړه چې، په راتلونکې کې به هم د یادې سیمې په ونو درمل وشیندي او د خړوبولو په برخه کې به یې هم له کابل ښاروالۍ همکار و اوسي