د کابل ښاروالۍ د کلتوري چارو رياست په هلو ځلو او د تاج شاهي ودونو تالار د مالک په مرسته، د څلورمې ناحيې اړوند د ترافيک او بُست څلورلارو دسړک په اوږدو کې د ښکلا تونل نصب شو. د کابل ښاروالۍ د کلتوري چارو رئیس قاري ولي ګل جواد وويل: دغه تونل (٥٢) متره اوږدوالى،(٢،٥) متره سور او ( 3 متره او ٢٠ سانتي) لوړوالى لري، چې دننه يې په تازه ګلانو او د تونل بهر په رنګه څراغونو سينګار شوى دى. دا کار د ښار ښکلا زیاتوي او زموږ دهیوادوالو د خوښۍ وړ ګرځي. ځکه د ښاري ښکلا د سمبولونو جوړول او نصبول ،د ښاریانو د لید او ذهني سکون لپاره ګټور او اغېزمن دي. د کابل ښاروالۍ دکلتوري چارو ریاست په پام کې لري چې، د ښاري ښکلا پروګرام د ښار په نورو برخو کې هم د ښاریانو په مرسته پلي کړي تر څو دهېوادوالو د لا زیاتې خوښۍ لامل شي