د کابل ښاروالۍ د ښاري خدمتونو او چاپیریال ساتنې مرستیال مولوي محمد خالد سجستاني د شپاړلسمې ناحیې اړوند مرنجان تپې پر سر د آزادۍ پارک د جوړولو له بهیر څخه لیدنه وکړه. ښاغلي سجستاني اړوند مسئولانو ته لارښوونه وکړه چې، د مرنجان تپې د زرغونتیا د پراخولو لپاره لا ډېرې هڅې وکړي، څو په یوه غوره تفریحي سیمه بدله شي. د یاد پارک د جوړولو په پروژه کې د ماشومانو او نویو ځوانانو لپاره د لوبغالو جوړول، د وسایطو پارکینګ، کانتین، داوږدو څوکیو او کټارو نصبول، د زرغونو سیمو پراختیا، د پلو لارو ، د اوبو فوارې او ګلدانونو جوړول په پام کې نیول شوي دي. د دغه تفریحي پارک په جوړېدو سره به ښاري ښکلا زیاته او ورسره جوخت به ښاریان یوه مناسب تفریحي ځای ته لاس رسی ومومي