د بنسټیزو چارو تر بشپړېدو وروسته، د اوومې ناحیې اړوند د چهلستون او پډولې سړکونو ترمنځ د نوي نښلوونکي سړک قیرچارې د کابل ښاروالۍ له لوري پیل شوې. د کابل ښاروالۍ د برنامو او پروژو د تنظیم ریاست د معلوماتو پر بنسټ دا سړک (۳۱۵) متره اوږدوالی او (۳۰) متره سور لري چې، د لښتیو، پلو لارو، د بایسکل چلولو کرښو، ګلدانونو او نورو برخو په ګډون به د نږدې ( ۲۲) میلیونه افغانیو په لګښت په بنسټیزه توګه جوړ شي. دا سړک له ځانګړي اهمیت څخه برخمن دی چې، په جوړېدو سره به یې د اړوند سیمو اوسیدونکي له ترانسپورټي او ټولنیزو آسانتیاو څخه برخمن او د چهلستون بازار په ګڼه ګوڼه کې به د پام وړ کمښت راشي