د کابل ښاروالۍ د ټولنیزو او کلتوري چارو مرستیال حاجي محمد نبي عثماني، نن د کاري ورځې په لومړيو کې د دعوت او ارشاد، خپرونو او عامه پوهاوي، د خلکو د همغږۍ چارو،د کلتوري چارو د ریاستونو او دکابل ژوبڼ له مسؤلینو سره، په کابل ښار کې د غوره ټولنیزو او کلتوري چوپړتیاوو د وړاندې کولو په اړه غونډه ترسره کړه. په غونډه کې د کابل ښاروالۍ د ټولنیزو او کلتوري چارو مرستیال د ښاري قانوني ژوند د رامنځته کیدو، د ښاري کلتور د ودې، د ښاري ستونزو د پېژندنې او حل په برخه کې، د رسنیو له لارې د اطلاعاتو د پیاوړتیا، د ګذر وکیلانو د ګمارنې د شرایطو، د چارواکو او ښاریانو ترمنځ د اړیکو د تأمینولو او له ښاري تأسیساتو څخه د سمې ګټې اخیستنې په موخه، اړوندو مسؤلینو ته لازمې سپارښتنې وکړې. دغه راز ښاغلي عثماني د يو شمېر رياستونو له اداري دفترونو څخه ليدنه وکړه او د اړوندو ادارو د کاري مسؤليتونو د لا ښه ترسره کولو په موخه يې خپل نظرونه او وړانديزونه له مسؤلينو سره شريک کړل