د ښاري کلتور د بډاینې او ترویج په موخه، د کابل ښاروالۍ د خپرونو او عامه پوهاوي ریاست په غوښتنه، په شلمه ناحیه کې ددغې ناحیې دمسئولینو او اوسیدونکو په ګډون تنظیفي حشر ترسره شو. د شلمې ناحیې رئیس مولوي عبدالغفور عمري د ښار په پاکوالي کې د ښاریانو رول مهم وباله او ویې ویل: که چېرته هر څوک د خپلو سیمو پاکوالي ته پام وکړي ډېر ژر به د یوه پاک او سمسور کابل شاهدان و اوسو. دغه راز د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین له ټولو هغه کسانو چې په یاد حشرکې یې په خپل ګډون سره د تنظیف ریاست کارکوونکو سره مرسته کړې وه مننه وکړه. نوموړي وویل چې د ښار آبادي او پاکوالی د هر ښاري دنده ده او په ښاري ژوند کې د ښاري اصولو او قوانینو په پام کې نیول یوه جدي اړتیا ده. ورته مهال د حشر ګډونوالو وویل: ښار د ټولو ګډ کور دی او ژمنه کوو چې، په پوره رښتینولۍ سره به دښار په پاکولو او د ونو په خړوبولو کې هڅه کوو. د یادونې وړ ده چې د یاد حشر په ترڅ کې د چهارآسیاب له بازار او نورو ورڅېرمه سیمو څخه کثافات راټول او ټاکلي ځای ته ولیږدول شول