د کابل ښاروالۍ او د کورنیو چارو وزارت د ترافیکو لوی ریاست ترمنځ د ترافیکي زیربناو جوړولو، د ګڼه ګوڼې د کمښت او د ښاري نظم په اړه د همغږۍ غونډه ترسره شوه. دا غونډه د کابل ښاروالۍ د ودانیزو چارو مرستیال انجنیر عامر زمرک یاسر، د کورنیو چارو وزارت د ترافیک لوی رئیس ډاکتر حسیب الله مختار، د کابل ترافیک رئیس مولوي خان محمد غاور او د کابل ښاروالۍ د یو شمېر تخنیکي څانګو مسئولینو په ګډون ترسره شوه چې، په کابل ښار کې د ترافیکي وضعیت د ښه کېدو په موخه، اړینې پرېکړې پکې ترسره شوې. د کابل ښاروالۍ د ودانیزو چارو مرستیال د ترافیکي او ترانسپورټي زیربناؤ جوړولو په ځانګړې توګه د یو شمېر نویو سړکونو د ډیزاین، د خیرخانې کوتل تر کار لاندې سړک او په نورو سړکونو کې د ترافیکي بهیر د تنظیم، د څلورلارو د بڼې بدلولو، په کابل ښار کې د ترافیکي نظم د ښه کېدو او د کابل ښاروالۍ د برنامو او پلانونو په اړه خبرې وکړې او په دې برخه کې یې د اړونده ادارو ترمنځ په همغږۍ ټینګار وکړ. په همدې توګه د ترافیکي بهیر پر وړاندې د ستونزو د له منځه وړلو په موخه، له بدیلو سړکونو ګټه اخیستنه، په بېلابېلو څلورلارو په ځانګړې توګه د بره کي او نجات څلي په څلورلارو کې د ګڼه ګوڼې کمښت نور هغه موضوعات و چې، په غونډه کې پرې خبرې وشوې او پرېکړه وشوه چې، په راتلونکي کې دې د هوايي او طبقوي پلونو د جوړولو پروژې په یادو دوو څلورلارو کې پلې شي