د ښاري کلتور د ودې او ګډو کارونو ته د خلکو د هڅولو په موخه، د عامه پوهاوي د برنامو په لړ کې د دوولسمې ناحیې په کچه د ونو خړوبولو حشر ترسره شو. په دې حشر کې چې، د کابل ښاروالۍ د ټولنیزو او کلتوري چارو مرستیال حاجي محمد نبي عثماني، د کابل ښاروالۍ یو شمېر رئیسانو، ګذر وکیلانو او ځوانانو ګډون کړی و، هر یوه د ښار د آبادۍ، پاکوالي او زرغونتیا په برخه کې د خدمت کولو ژمنې وکړې. د کابل ښارالۍ د کلتوري چارو رئیس قاري ولي ګل جواد خلک د ونو خړوبولو ته وهڅول او ویې ویل: د کابل ښاروالۍد زرغونتیا ریاست امکانات محدود دي او نشي کولای په یوازې توګه د ښار په کچه ټولې ونې او زرغونې سیمې خړوبې کړي. دغه راز د کابل ښاروالۍ د خپرونو او عامه پوهاوي ریاست مرستیال احمد علي عمري د اسلام مبارک دین له نظره، د مسئولیت ترسره کولو په اړه خبرې وکړې او ویې ویل: په ښاري ژوند کې د سوکالۍ رامنځته کولو لپاره د مسؤلینو او ښاریانو ترمنځ د مرستې پیاوړې روحیې ته اړتیا ده ،اسلام د نظم او جوړولو دین دی چې د بشري ژوند د ټولو برخو لپاره غوره برنامې لري. د ښاغلي عمري په وینا نن ورځ له کابل ښاروالۍ سره د دوولسمې ناحیې د اوسیدونکو مرسته او ګډ کار، د کابل ښاروالۍ پر مسئولینو د باور ښکارندویي کوي. ورته مهال د دوولسمې ناحیې اوسېدونکو ژمنه وکړه چې، د پاک، زرغون او آباد کابل درلودلو په موخه به له کابل ښاروالۍ سره تل همکار و اوسي