د کابل ښاروالۍ معلوماتي ټکنالوژۍ او مالیې وزارتونو، برښنا شرکت او د اوبو رسونې او ښاري فاضلاب شرکت ترمنځ د ښاري تأسیساتو له ويجاړېدو څخه د مخنیوي،په ځانګړې توګه په سړکونو او پلو لارو کې له بې ځایه کېندنو څخه د مخنیوي په اړه د همغږۍ غونډه ترسره شوه. په دې غونډه کې چې، د کابل ښاروالۍ د ښاري خدمتونو او چاپېریال ساتنې مرستیال مولوي محمد خالد سجستاني، د پلان جوړونې او ښاري پراختیا مرستیال ډکتر صدرالدین تاجک او د یادو ادارو استازو او رئیسانو ګډون کړی وو؛ په راتلونکي کال کې د یادو ادارو له لوري د اوبو رسونې، انټرنټ او برښنا د شبکو جوړولو لپاره د پلان په برابرولو، د اصلي سړکونو د جوړولو پر مهال د یادو شبکو د جوړولو لپاره د اضافه ځای په نظر کې نیولو، د بودجې د څرنګوالي او له کابل ښاروالۍ سره د پلانونو په همغږۍ کولو ټینګار وشو او اړینې پرېکړې ترسره شوې. له بده مرغه د ښار په کچه یو شمېر سړکونه او پلې له لارې په تېر کې د اوبو رسونې، انټرنټ ا و برښنا د شبکو جوړولو پر مهال د همغږۍ نشتون له امله بې ځایه کيندل شوي او د ویجاړېدو په حال کې دي. کابل ښاروالي د ښاري زیربناوو د ساتلو په موخه د ښاري سکټور له ادارو څخه د لا ډېرې همکارۍ غوښتنه کوي