د دریمې او شپږمې ناحیې په اړوند سیمو کې له ودانیو څخه کابل سیند سره په ناقانونه توګه د فاضلاب نښلول شوې لارې پاکې او ویجاړې شوې. د کابل ښاروالۍ د چاپیریالي روغتیا او چاپیریال ساتنې ریاست مسئولین وايي: دا کار تر بیا بیا سپارښتنو وروسته ترسره شوی دی او نورو ناحیو ته هم دا لړۍ غځول کیږي. د یاد ریاست د سروې پر بنسټ؛ د کابل سیند په اوږدو کې (۶۰۴) د فاضلاب لارې په ګوته شوې دي چې، د نه اصلاح په صورت کې به یې د فاضلاب لارې بندې او ویجاړې شي. په دې وروستیو کې (۶۰) داسې سرغړونې د شپږمې ناحیې او (۵۰) نورې د دریمې ناحیې په اړوند سیمو کې په ګوته شوې او رسېدنه ورته شوې ده. د کابل سیند په اوږدو کې یو شمېر د ودانیو مالکانو ته سپارښتنه شوې ده چې، د خپلو ودانیو د فاضلاب سیستم اصلاح کړي او کابل سیند ته یې له را پرېښودلو څخه ډډه وکړي. د یادونې وړ ده چې، هېڅ سوداګریزه او استوګنیزه ودانۍ باید د فاضلاب لارې کابل سیند ته را پرېنږدي. کابل سیند او لښتیو ته د فاضلاب لارو را پرېښودل، د چاپیریال او څښاک اوبو د ککړتیا لامل ګرځي