د کابل ښاروال مولوي عبدالرشید په مشرۍ او د مرستیالانو، د مرکزي ریاستونو او ناحیو د یو شمېر رئیسانو په ګډون په کابل ښار کې د ترانسپورټي زیربناو جوړولو په اړه تخنیکي ترسره شوه. کابل ښاروال تر بحث او خبرو وروسته له ښار جوړونې وزارت سره پر همغږۍ ټینګار وکړ او ویې ویل: د غوره ترانسپورټي شبکو او د سړک جوړونې د پلانونو پلي کولو په اړه دې د ښار جوړونې وزارت نظرونه او وړاندیزونه واخيستل شي. نوموړي دغه راز زیاته کړه چې، د سړکونو په ډيزاین کې دې هڅه وشي چې، لږ ودانۍ او کورونه تر استملاک لاندې راشي څو،په دې توګه خلک کم متضرر شي او له بل لوري د بدیلو استملاکي حقونو په ورکولو کې سپما وشي. په همدې توګه کابل ښاروال ټینګار وکړ چې، د ترانسپورټي او ترافیکي ستونزو د حل په موخه دې د خیرخانې کوتل د سړک چارې لا چټکې شي او یو شمېر نور سړکونه دې هرڅه ژر ډیزاین او تر استملاکي پړاونو تېر شي ترڅو، د جوړولو په اړه يې اقدام وشي. ټاکل شوې ده د ۱۴۰۳ کال په پرمختیايي پلان کې برابرې پراختیا ته په کتو له ماسټر پلان سره برابر ګڼ شمېر سړکونه شامل شي چې، بنسټیز سړکونه به له ټاکلو، سروې او ډیزاین وروسته تدارکاتي پړاونو ته داخل شي