د لسمې ناحیې اړوند د شیرپور څلورلارې د ښکلا چارې د کابل ښاروالۍ د ټولنیزو او کلتوري چارو د مرستیال حاجي محمد نبي عثماني له لوري د پټۍ په پرېکولو سره پیل شوې. د کابل ښاروالۍ مرستیال ښاري ښکلا برنامو ته د خصوصي سکټور له هڅولو سربېره وویل: ښاري ښکلا رامنځته کول د کابل ښاروالۍ لومړیتوب دی چې، دا چاره د ښاریانو په رواني دید کې غوره بدلون راولي او دا لړۍ به د ښار په کچه نورو برخو ته هم وغځول شي. په همدې توګه د کابل ښاروالۍ د کلتوري چارو رئیس قاري ولي ګل جواد وویل: په یاده څلورلارې کې د ۹ متره په لوړوالي د هېواد له داخلي تیږو څخه په ګټه اخیستلو د ښاري ښکلا یو سمبول، کټارې او ګلدان جوړیږي، چې چارې به یې د عزیزي بانک په مرسته په معیاري توګه د څه باندې یو میلیون افغانیو په لګښت د یوې میاشتې په موده کې بشپړې شي. نوموړي زیاته کړه چې، د کابل ښاروالۍ د کلتوري چارو ریاست هڅه کوي چې، تاریخي ارزښتونو او پرمختللو معیارونو ته په کتو د ښاري ښکلا برنامې د سوداګرو او پانګوالو په مرسته په بېلابېلو سیمو کې پلې کړي او د ښاریانو د خوښۍ سبب وګرځي