د ښاریانو لخوا د ترلاسه شویو شکایتونو پر بنسټ د کابل ښاروالۍ له لوري د اتمې ناحیې اړوند په رحمن مېنه کې د پاپړو او سیمیانو د یوې تولیدي کارخانې د فعالیت له څرنګوالي څارنه وشوه. د کابل ښاروالۍ د مارکیټونو د تنظیم ریاست مرستیال انجنیر عصمت الله انصار وویل: د یادې کارخانې د حفظ الصحې وضعیت کابل ښاروالۍ ته د قبول وړ نه و او اړینه ده د یادې کارخانې مالکان خپل فعالیتونه له معیارونو سره برابر کړي، څو په اوسني وضعیت کې یې غوره بدلون راشي . نوموړي زیاته کړه چې، د دې کارخانې فعالیت کوونکو ته سپارښتنه وشوه څو د کابل ښاروالۍ له اصولو او مقرراتو سره خپل فعالیتونه برابر کړي، له دې پرته به یې فعالیت بند شي. د یادونې وړ ده چې، یو شمېر ښاریانو د یادې کارخانې له غیر معیاري فعالیت شکایت کړی و چې، پر بنسټ یې د کابل ښاروالۍ مسئولینو پر وخت اقدام وکړ. د کابل ښاروالۍ مسئولین ژمنتیا لري، څو په بازارونو کې د فابریکو، کارخانو او ټولو اصنافو فعالیتونه د حفظ الصحې له اړخه تنظیم کړي