د کابل ښاروالۍ د ټولنیزو او کلتوري چارو مرستیال حاجي محمد نبي عثماني د ښاري او سیمه ایزو ستونزو د پېژندلو او د هغو د حل په موخه، د درېیمې، څلورمې، پنځمې او شپږمې ناحیې د ګذر وکیلانو له شوراګانو سره د همغږۍ ناسته ترسره کړه. د کابل ښاروالۍ د ټولنیزو او کلتوري چارو مرستیال د سیمه ایزو او ښاري ستونزو په له منځه وړلو کې د ګذر وکیلانو رول مهم وباله او هیله یې څرګنده کړه چې، ګذر وکیلان به خپل مؤکلین د ټولنیزو او فردي مسئولیتونو ترسره کولو ته وهڅوي. نوموړي ټینګار وکړ چې، ګذر وکیلان باید د کابل ښاروالۍ د پلانونو او برنامو په پلي کېدو کې خپل دیني او ملي مسئولیتونه ادا کړي. په همدې توګه د کابل ښاروالۍ د خلکو د همغږۍ چارو رئیس محمد ناصر کبیري د ګذر وکیلانو د مسئولیتونو په اړه رڼا واچوله او ویې ویل چې، د کابل ښار ګذر وکیلان د کابل ښاروالۍ له مسئولینو سره مرستې کولو ته ژمن دي او په راتلونکې کې هم باید خپلې مرستې له کابل ښاروالۍ څخه ونه سپموي. ورته مهال د یادو ناحیو ګذر وکیلانو له کابل ښاروالۍ سره دهر ډول مرستو ژمنه وکړه او خپلې سیمه ایزې ستونزې یې د کابل ښاروالۍ له مسئولینو سره شریکې کړې چې، سرچینو او امکاناتو ته په کتو به ورته رسېدنه وشي