د اطلاعاتو او کلتور وزارت په نوښت او د کابل ښاروالۍ په مرسته، د کتاب لوستلو دکلتور د ودې او کتاب لوستلو ته د ښاریانو د هڅونې په موخه، د پل سوخته په سیمه کې د کتابونو دوه ورځنی نندارتون جوړ شو. دکابل ښاروالۍ په استازیتوب دپنځمې ناحیې مرستیال رفیع الله احمدزي د غونډې ګډونوالو ته د ښه راغلاست ویلو په ترڅ کې د دغه نندارتون له تنظیموونکو څخه ستاینه وکړه او د لوستلو او مطالعې پر اهمیت یې خبرې وکړې او ویې ویل: کتاب د انسان تر ټولو ښه او تل پاتې ملګری دی، او د داسې برنامو جوړول یې د ښاریانو د هڅونې لپاره یو نېک کار وباله. نوموړي زیاته کړه: موږ کولای شو د خپل هېواد ستونزې د کتابونو له لارې حل کړو، کابل ښاروالۍ په بېلابېلو ناحیو کې د کتابونو د نندارتونونو د ترسره کېدو لپاره هر ډول مرستو ته چمتو ده. ښاغلي احمدزي وویل: اوس مهال کابل ښاریان په ځانګړې توګه ځوانان دلته په لیوالتیا او مینې سره د کتاب اخیستلو لپاره راځي او موږ ډاډه یوو چې، د کتاب لوستلو دود مخ پر ښه کېدو روان دی. په دغه نندارتون کې د لسګونو میزونو په ایښودلو سره، د بېلابېلو خپروندیو ټولنو چاپ شوي آثار نندارې ته وړاندې شوي، چې د کتابونو د پېرلو ترڅنګ ،مينه وال کولای شي په دغه ځای کې کتابونه هم ولولي. د يادونې وړ ده، چې پخوا د پل سوخته سیمه په ناسمه توګه کارول شوې وه او نن له نېکه مرغه د کابل ښاروالۍ د مشرتابه په هڅو په دغه ښاري سيمه کې يو ښکلی او مثبت بدلون رامنځته شوی، چې په راتلونکي کې به پراختیا ومومي