د شپږمې ناحیې اړوند د پل سوخته څلورلارې او جمهوریت پله ترمنځ د نوي جوړېدونکي سړک د خنډونو پاکولو او استملاکي کورونو ویجاړولو چارې پیل شوې. د یادې ناحیې رئیس مولوي محمد ايوب ثابت د سیمې له اوسېدونکو وغوښتل چې، د دې پروژې د پلي کېدو پر وړاندې خنډ ونه ګرځي او له کابل ښاروالۍ سره همکار و اوسي. نوموړي زیاته کړه چې، د دې سړک جوړول د ماسټر پلان له مخې د کابل ښاروالۍ لومړیتوب دی چې، نن یې عملي چارې پیل کړې. ښاغلي ثابت دغه راز وویل چې، د دې سړک په اوږدو کې ۸۰ ملکیتونه او کورونه تر استملاک لاندې دي چې، د قانون له مخې یې مالکانو ته بدیل حقونه ورکول کیږي. د استملاکي خنډونو تر پاکولو وروسته به د دې سړک چارې د ۹۰۰ متره په اوږدوالي او د ۳۰ متره په سور سره په بنسټیزه توګه جوړ شي. د یادونې وړ ده چې، د دې سړک په جوړېدو سره به د سیمې د اوسېدونکو ستونزې حل او ورسره جوخت به ګڼ شمېر ښاري آسانتیاوو ته لاس رسی ومومي او د سیمو اقتصادي ودې ته به زمینه برابره کړي