د کابل ښاروالۍ د خلکو د همغږۍ چارو ریاست له لوري د دوه ویشت ګونو ناحیو د ګذر وکیلانو او علماؤ شورا له رئیسانو سره په هرات ولایت کې د وروستۍ زلزلې له امله له زیانمنو کسانو سره د مرستې په موخه د چمتوالي غونډه ترسره شوه. په غونډه کې د کابل ښاروالۍ د خلکو د همغږۍ چارو رئیس محمد ناصر کبیري له یادو شوراګانو څخه غوښتنه وکړه چې، د هرات له زیانمنو خلکو سره د مرستې لپاره دې ټول ښاریان وهڅول شي، څو په دې برخه کې خپله دیني او ملي دنده ادا کړي. نوموړي څرګنده کړه چې، کابل ښاروالۍ د هرات په غمیزه کې ځان شریک بولي او له زیانمنو کسانو سره مرستې کولو ته چمتو ده. د ګذر وکیلانو او د دیني علماؤ استازو ژمنه وکړه چې، د هرات له زیانمنو کسانو سره به د مرستې لپاره لاس پکار شي او له ټولو ښاریانو په تېره له ملي سوداګرو او پانګوالو سره په همغږۍ به د مرستو کڅوړې جوړې او ډیر ژر به یې هرات ولایت ته واستوي