د کابل ښاروالۍ د تنظیف ریاست له لوري د هوايي ډګر په سیمه کې د وزیر آباد کانال د پاکولو چارې پیل شوې. ټاکل شوې ده له درېیم پروان څخه تر هوايي ډګر پورې د یاد کانال د څه باندې لس کیلو مترو په اوږدوالي برخه، له کثافاتو څخه پاکه شي. څه موده وړاندې د یاد کانال فرعي کانالونه، له سرای شمالي څخه تر لب جر او د هنګرها تر څلورلاې پورې له کثافاتو پاک شوي وو. د دې لوی کانال د بندېدو اصلي لامل، په هغه کې د ښاریانو له لوري د کثافاتو اچول دي. له ټولو ښاریانو غوښتنه کیږي چې، د دې کانال پاک ساتلو ته پام وکړي، ځکه د بیاځلي پاکولو په برخه کې یې د کابل ښاروالۍ ډیری مالي او بشري سرچینې مصرف کیږي. د یادونې وړ ده چې د یاد کانال د اساسي پاکولو په موخه، د کابل ښاروالۍ د تنظیف ریاست له لوري دوه بندونه هم جوړ شوي دي څو، د پاکولو پر مهال راټول شوي کثافات بېرته پاکو ځایونو ته ونه لیږدول شي