کابل ښاروال مولوي عبدالرشید د نهمې او شپاړلسمې ناحیې له اداري دفترونو څخه د لیدنې پر مهال د یادو ناحیو د مسئولینو کړنې و ارزولې. په دې لیدنه کې کابل ښاروال وویل چې، له کارکوونکو سره د مکافاتو او مجازاتو اصل له مخې چلند کیږي او هېڅ کارکوونکی حق نلري چې، د ښاري نظم په راوستلو، د ښاري خدمتونو د محصول په راټولولو، تنظیفي او د زرغونتیا خدمتونو په وړاندې کولو، د غصب شویو ځمکو بېرته راګرځولو، د سیمه ایزو ستونزو د حل او د مراجعینو د سندونو په پړاوونوکې ځنډ او غفلت وکړي. په همدې توګه نوموړي د یادو ناحیو د اداري دفترونو د اړتیاوو او امکاناتو پوره کولو په برخه کې هم اړینې لارښوونې وکړې، څو دچارو په ترسره کولوکې د ځنډ او خنډ مخه ونیول شي. د ارزونو په لړ کې د اداري فساد او وظیفوي غفلت له امله به د یادو ناحیو درې تنه کارکوونکي له دندو ګوښه کړاى شي