د ریاست الوزرا د اقتصادي کمیسیون د پرېکړې له مخې؛ د کابل ښاروالۍ د ښاري خدمتونو او چاپېریال ساتنې د مرستیال مولوي محمد خالد سجستاني په مشرۍ او د کابل ښاروالۍ د مرکزي ریاستونو او یو شمېر ناحیو د رئیسانو په ګډون د ډبرو سکرو د پلورلو له قراردادي شرکت سره په کابل ښار کې د ډبرو سکرو د پلور د څرنګوالي په اړه د چمتوالي غونډه ترسره شوه. په دې غونډه کې د ښاري خدمتونو او چاپېریال ساتنې مرستیال د کابل ښاروالۍ او نورو اړوندو ادارو د مسؤلینو ترمنځ پر شفافیت او لا ډېرې همغږۍ ټینګار وکړ او ویې ویل: د ډبرو سکاره باید په مستحقو او اړمنو کسانو په ټیټه بیه وپلورل شي او په لوړه بیه یې له پلورلو ، احتکار او کیفیت څخه باید په دوامداره توګه څارنه وشي. ښاغلي سجستاني څرګنده کړه چې، د تېر کال له تجربو څخه باید درس واخیستل شي او زیانمنو سیمو ته دې مسئولین ډېر پام وکړي. ورته مهال د کابل ښاروالۍ د پلان، پالیسۍ، څارنې او ارزونې مرستیال او په کمیسیون کې د دې ادارې استازي محمد آصف جلالزي وویل: د کانونو او پطرولیم وزارت به د قرارداد له مخې سږ کال د ښاریانو د اړتیا وړ د ډبرو سکاره د یوه خصوصي شرکت له لارې په مناسبه بیه او لوړ کیفیت وپلوري. نوموړي اړمنو کسانو ته د ډبرو سکرو د پلور اندازه، د پلور ځایونو او د کیفیت او بیې د کنټرول په اړه د مارکیتونو د تنظیم ریاست، ناحیو او قراردادي شرکت د دندو او مکلفیتونو په اړه هم بشپړ معلومات وړاندې کړل. ورته مهال د ناحیو رئیسانو او د قراردادي شرکت استازي هر یوه په خپل وار د ډبرو سکرو د پلور د څرنګوالي په اړه خپل نظرونه او وړاندیزونه شریک کړل