د کابل ښاروالۍ د خپرونو او عامه پوهاوي ریاست له لوري د درېیمې ناحیې اړوند د رحمن بابا لېسې له زده کوونکو سره د عامه پوهاوي غونډه ترسره شوه. د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین د دې لېسې زده کوونکي د ښاري کلتور پام کې نیولو ته وهڅول او ویې ویل: ښاري ژوند له یو لړ ښاري اصولو او قوانینو سره تړلی دی چې باید په پام کې ونیول شي. نوموړي له زده کوونکو وغوښتل څو د ښاري پلانونو او پروژو په پلي کېدو کې له کابل ښاروالۍ سره همکار و اوسي، ځکه د ښوونځیو زده کوونکي د ښاري کلتور په دودولو کې ارزښتناکه رول لوبولی شي. په همدې توګه د رحمن بابا لېسې مدیر مولوي سمیع الله صدیقي له کابل ښاروالۍ سره د همکارۍ ژمنه وکړه او ویې ویل: په خپلو درسي برنامو کې به زده کوونکو ته د ښار پاکوالي، د ونو د خړوب، له عامه تأسیساتو د غوره ګټې اخیستنې او عامه شتمنیو د ساتنې په اړه معلومات ورکړي. نوموړي زیاته کړه چې که په ښاري ژوند کې ټول خپلو مسئولیتونو او مکلفیتونو ته پام وکړو، ډېر ژر به د ښار د آبادۍ او ښکلا شاهدان و اوسو. په دې غونډه کې د ښاري مسایلو په اړه د عامه پوهاوي یو شمېر ويډویي کلپونه هم نندارې ته وړاندې شول او په همدې توګه د زده کوونکو لپاره د پوښتنې او ځواب زمینه برابره شوه، څو په ښاري ژوند کې خپلو ټولنیزو مسئولیتونو ته پام وکړي. د غونډې په پای کې په زده کوونکو د عامه پوهاوي په اړه یو شمېر ډالۍ چې د کابل ښاروالۍ له لوري برابرې شوې وې، ووېشل شوې