د بادام باغ او باغ بالا ترمنځ د نوي نښلوونکي سړک د جوړولو چارې چې، څه موده وړاندې د کابل ښاروالۍ له خوا پیل شوې وې، په چټکۍ سره روانې دي. د کابل ښاروالۍ د کار، ساتنې او څارنې ریاست د مسؤلینو په وینا؛ دغه سړک چې، (۹۰۰) متره اوږدوالی او (۲۰) متره سور لري، د سړو موسم تر رسېدو وړاندې به په بنسټیزه توګه جوړ او ګټې اخیستنې ته وسپارل شي. اوس مهال د یاد سړک د بنسټیزو برخو د جوړیدو چارې روانې دي، چې ډېر ژر به یې د بشپړو شویو برخو د قیر کولو چارې هم پیل شي. د سړک جوړونې په دې پروژه کې د استنادي دېوالونو، پلولارو او لښتیو جوړول شامل دي چې، د څلورمې، پنځمې او اولسمې ناحيو ځینې سیمې یو بل سره نښلوي. ددغه سړک په جوړېدو سره به له یوې خوا د ښاريانو لپاره ګڼې آسانتياوې رامنځته او له بلې خوا به د ګاونډيو سيمو اقتصادي ودې ته هم زمینه برابره شي