د بنسټیزو چارو تر بشپړیدو وروسته، د عدلیې وزارت له مخې څخه د دارالامان تر افشار پورې یو کیلو متر سړک قیر کولو ته چمتو شوی دی. د کابل ښاروالۍ دبرنامو او پروژو دتنظیم ریاست د زیربنايي پروژو د څارنې آمر انجنیر محمد حامد سادات په دې اړه وویل: دغه سړک چې په ټولیزه توګه (۲۱۸۶) متره اوږدوالی او(۴۵) متره سور لري، یو کیلو متر برخه به یې ډېر ژر قیر شي. نوموړي زیاته کړه، د دې سړک د پاتې برخې بنسټیز کارونه هم روان دي او هڅه کیږي چې، د سړو موسم تر را رسېدو وړاندې یې د قیرکولو چارې بشپړې شي. د عدلیې وزارت له مخې څخه د دارالامان تر افشار پورې دیاد سړک دجوړولو په پروژه کې پلې لارې، لښتي، تم ځایونه، ګلدانونه او د یوه معیاري سړک نور برخې هم په پام کې نیول شوي دي. دا پروژه له خورا اهمیت څخه برخمنه ده چې، په بشپړیدو سره به یې ښاریانو ته ګڼې ترافیکي، ترانسپورټي او ښاري آسانتیاوې رامنځته او د سیمې اقتصادي ودې ته به زمینه برابره شي