د کابل ښاروالۍ له لوري د باغ قاضي سړک په منځني ګلدان کې کټارې نصب شوې چې د کلتوري چارو د رئیس قاري ولي ګل جواد او د لومړۍ ناحیې د رئیس مولوي محمد عاصم له لوري په داسې حال کې چې یو شمېر سوداګرو او هټیوالو یې ملتیا کوله ګټې اخیستنې ته وسپارل شوې. د کابل ښاروالۍ د کلتوري چارو رئیس د یادې سیمې له پانګوالو او هټیوالو چې، د ښاري ښکلا په برنامه کې یې برخه اخیستې وه مننه وکړه او ویې ویل: د لومړۍ ناحیې د مسئولینو، هټیوالو او ملي سوداګرو په هڅو، په دې ګلدان د شاوخوا د (۵۲۰) متره په اوږدوالي او (۱،۵) مترو په لوړوالي کټارې نصب شوې چې، ورسره د سيمې په ښکلا کې د پام وړ بدلون را منځته شو. د لومړۍ ناحیې رئیس مولوي محمد عالم عاصم بيا وویل: مخکې په دې ځای کې ګرځنده پلورونکو او ګرځنده کراچۍ لرونکو ناقانونه فعالیت کاوه چې، د لارو د بندېدو او د ګلدان د ویجاړېدو لامل ګرځيدلي وو چې هغه اشخاص اوس مهال ټاکلو سیمو ته لیږدول شوي دي. نوموړي له هټیوالو او سوداګرو غوښتنه وکړه چې، د ګڼې ګوڼې د مخنیوي په موخه دې خپل مالونه د لوړ ولټاژ لرونکو وسایطو په وسیله د شپې مهال ولیږدوي او د ورځې دې یوازې له کوچنیو موټرو څخه ګټه واخلي. ښاغلي عاصم زياته کړه چې، د دې ګلدان د زرغونو سیمو د پراختیا په موخه به د کابل ښاروالۍ د زرغونتیا ریاست اقدام وکړي چې له یوې خوا به ښاري ښکلا ډېره شي، او له بلې خوا به په ترافیکي بهیر او ښاري نظم کې مثبت بدلون راشي