له ناحیو څخه د لیدنو د کارکوونکو او مسئولینو د کړنو ارزولو په لړ کې، کابل ښاروال مولوي عبدالرشید د پنځمې ناحیې د مسئولینو کړنې و ارزولې او ټینګار یې وکړ چې، په دې ناحیه کې د ښاري خدمتونو وضعیت د ښه کېدو په برخه کې ډېر کار ته اړتیا ده. د نوموړي په وینا د کابل ښاروالۍ ټول کارکوونکي د خلکو خادمان دي او اړینه ده چې د دې ادارې له مراجعینو سره نیک چلند وشي او هر کارکوونکی باید خپله دنده په پوره ريښتینولی او صداقت ترسره کړي. کابل ښاروال د ښاري نظم، له ښاري تأسیساتو څخه د غوره ګټې اخیستنې، د ښاري خدمتونو د محصول راټولولو، دغصب شویو ځمکو بېرته راګرځولو، تنظیفي او د زرغونتیا خدمتونو وړاندې کولو او د ښاري او سیمه ایزو ستونزو د حل په برخه کې مسئولینو ته ځانګړې لارښوونې وکړې. دغه راز نوموړي وویل: د کابل ښاروالۍ کارکوونکي باید د خپلو مسئولیتونو په ترسره کولو کې له هېڅ راز هڅو څخه دریغ ونکړي. کابل ښاروال زیاته کړه چې، په اداري سیستم کې د اصلاحاتو راوستو په هڅه کې یو او د چارو په ترسره کولو کې غفلت، د کابل ښاروالۍ مسئولینو او ښاریانو ته د منلو وړ نه دی